‘मी ‘पुलं’च्या पुस्तकांची लहानपणापासूनच पारायणं केली आहेत. ‘पुलं’ची भाषा अत्यंत साधी-सोपी आहे आणि विनोदही अगदी साधा-सोपा आहे, असं वाचताना वाटतं; पण जेव्हा ते सादर करायला जातो, तेव्हा त्याचा अभ्यास केल्याशिवाय करता येत नाही,’ अशी भावना ‘व्यक्ती आणि वल्ली’मध्ये नारायणाची भूमिका साकारणारे अभिनेते संदीप पाठक यांनी ‘पुलं’च्या जयंतीनिमित्त ‘बाइट्स ऑफ इंडिया’कडे व्यक्त केली.
संदीप पाठक म्हणजे प्रशांत दामलेंसोबत ‘जादू तेरी नजर’ नाटकातून ‘बोगस’ या धमाल भूमिकेत धुमाकूळ घालून आपली छाप पडणारा, ‘वऱ्हाड निघालाय लंडनला’सारखं एकपात्री नाटकाचं आव्हान सहज पेलणारा आणि टीव्हीवरचे ‘घडलंय बिघडलंय’ आणि ‘फू बाई फू’सारखे शोज गाजवणारा हुशार अभिनेता.
(प्रतिनिधी : प्रसन्न पेठे, स्नेहा कोंडलकर)
